На днях на базе Рэспубліканскага цэнтра экалогіі і краязнаўства прайшло заключнае мерапрыемства рэспубліканскага конкурса «Капітал месца». У яго адборачных этапах, якія праходзілі ва ўсіх раёнах Беларусі, паўдзельнічалі больш за 670 навучэнцаў.
Пераможцы абласнога этапу конкурса прадстаўлялі свае праекты на культурна-спартыўным фестывалі «Вытокі» ў Жлобіне, Баранавічах, Слоніме, Глыбокім, Касцюковічах і Барысаве. На рэспубліканскі этап было адабрана толькі 96 лепшых праектаў, якія дэманструюць этнакультурную спадчыну свайго рэгіёна. 18 праектаў у трох намінацыях – «Традыцыі. Звычаі. Гульні», «Адзежа. Абутак», «Гастрасімвалы» – увайшлі ў спіс пераможцаў і прызёраў.
У першы дзень удзельнікаў чакала насычаная праграма конкурсных мерапрыемстваў: прэзентацыя праектаў у форме інфармацыйнага батла «Ствараючы, захоўваем і памнажаем традыцыі краю», кірмаш творчых ідэй «Капітал майго месца», прэзентацыі праектаў для ўдзельнікаў моладзевага форума «100 ідэй для СНД».
На другі дзень вучняў і іх кіраўнікоў пазнаёмілі з сістэмай работы па аднаўленні і захаванні этнакультурнай спадчыны гарадскога пасёлка Смілавічы Чэрвеньскага раёна. Удзельнікі конкурса наведалі музей Станіслава Манюшкі, помнік ахвярам генацыду – расстраляным падчас Вялікай айчыннай вайны жыхарам Смілавіч, музейную прастору знакамітага мастака Хаіма Суціна і музей мануфактуры ў сярэдняй школе № 2.
Кульмінацыяй заключнага дня мерапрыемства стала цырымонія ўзнагароджання пераможцаў, на якой вучаніца Махнавіцкай сярэдняй школы Мазырскага раёна Марыя Церах атрымала дыплом за другое месца і прыз сімпатый глядачоў!
Каманда ўдзельнікаў ад Махнавіцкай сярэдняй школы ўскладзе вучаніцы 8 класа Марыі Церах, настаўніка гісторыі і грамадазнаўства Віталія Рудака і настаўніка нямецкай мовы Вольгі Завадскай выражае падзяку Міністэрству адукацыі Рэспублікі Беларусь, Рэспубліканскаму цэнтру экалогіі і краязнаўства і ТАА «Белбрэндаудыт» за цікавыя і пазнавальныя мерапрыемствы на ўсіх этапах конкурса.
Падрыхтавала Вольга ЛАСУТА.
